謝霆鋒余文樂N度合作--「救火英雄」

睇過「激戰」，睇過「掃毒」，最近睇埋「救火英雄」，三套裡面最喜歡邊一套就唔透露啦，但「救火英雄」可能出於本身對其期望太大，加上首歌未睇套戲之前已經喪聽主題曲《愛最大》，又可能係因為我喜歡大團圓結局多D………吧，再加上因為………所以，嗯係囉係囉。



OK，言歸正傳，久違的謝霆鋒余文樂合作，今次一個背負出賣，一個出生入死，一個冷靜，一個熱情，一凹一凸，因果早已經作好安排。雖然是以消防作主題電影，但除咗火辣辣嘅男兒熱血外，呢個組合所產生嘅催淚作用，絕對有過之而無不及。另一睇頭要數到任達華同胡軍，一次又一次嘅打不死比拼，嗰一打永遠都飲唔到嘅啤酒，足以令我心顫抖手。



而陳偉霆William，好老實講句真係尚欠點，可能是新手吧！反之吳浩康呢個隊長戲份唔多，但恰到好處。智叔，三個字：唔駛多講，好戲大家有目共睹。而可能大家無留意到嘅，會係成套戲唯一嘅奸角，發電廠老細譚耀文，佢真係將嗰種決策人嘅無奈、絕望演譯得淋漓盡致，尤其係佢中毒嗰一刻同嗰一張門匙咭，簡直係人性最後嘅光輝。

其他演員就唔一一細數啦，反而有幾點唔係太喜歡嘅係，又粵語又國語又英語，商業電影太刻意兼顧大陸市場啦；其次係有某程度嘅專業述語，相信觀眾好難理解，其實可以加返少少註解。總結一下：角色鮮明，略嫌劇情鋪排過硬，較多運用了恐怖鏡頭及音樂描述，氣氛緊湊，唯時空的穿越太過於著重，另又以「濃煙」作為整個故事的中心，整體而言，七十元的票價絕對值得一看。